أمواج أفكار متصادمة

دوّامة فكرية و موج عالي من الأفكار كانت بتدور في ذهن عبد الفتاح من حوالي 4 سنين و تحديدا في شهر نوفمبر ، كان زي اللي بيدوّر على طرف خيط يستدل به لبَر الأمان ، وبيلف يمين و شمال بيدوّر يمكن يلاقي الحل ..

و في يوم كان راجع ميدان رمسيس راكب ميكروباص من ميدان هيليوبليس في مصر الجديدة و هو سرحان كالعادة

– مالك؟

قطع السؤال دا حبل أفكاره فانتفض و بص للي قاعد جنبه في الميكروباص

= بفكّر في موضوع كدة .. أنا لقيت نفسي في حاجة مش عارف هي موهبة ولا أنا اتعلمتها و بدأت أبقى كويس فيها .. بس أنا عايز أدخل سوق العمل و مش عارف أبتدي منين

– قريت عنها كويس

= مارستها في نشاط تطوعي

– طب ما تجرب الفري لانس!

= يعني ايه كلمني عنه؟

* اديله واحد من عشرين يا كابتن*

“قطع كلامهم راجل عجوز ماسك جرنال في ايد و بيمدله العشرين جنيه بايده التانية”

يعنى ايه فرى لانسر

خد منه الفلوس وهو بيكمل كلامه: يعني ايه فري لانسر بقى؟ فري لانس يعني أعمال حرة وفري لانسر بالتتابع هو الشخص اللي بيشتغل شغل حر ، انت بتكون متمكن من حاجة معينة و بتحبها و بتبتدي تعرض خدماتك فيها للناس اللي محتاجة مثلا أصحاب المهن الحرّة زي النجار و النقّاش و السبّاك والمحامي و اللي زيهم كتير انت بتكلمه يخلصلك شغلانة معينة و بتديله عليها فلوس و هو بيبني خبرته فيها مع الوقت و الممارسة ..

– تمام يا باشا بس اللي أنا بكلمك فيه غيرهم خالص أنا دماغي كلها في النت!

= يا كبير دا النت دا هو أشهر حاجة في الفري لانس اليومين دول بالذات يعني مثلا مصممين المواقع فري لانسرز .. الشركات أو الأشخاص بيكلموهم يصمموا الموقع و يحاسبوهم بعدها ، الديزاينرز ، السوشيال ميديا ماركتنج ، الفيديو ايديتنج ، الترجمة ، التصوير ، كتابة المحتوى ، الـ Data entry و الأبحاث .. مجالات كتيرة جدا

ازاي ابدا شغل فري لانسر

– دا الموضوع طلع كبير بقى ، طيب قولي ازاي ابدا شغل فري لانسر؟

= انت كنت قلتلي انك بدأتها في نشاط تطوعي صح؟

– تمام

= حلو جدا ، انت كدة لخصت خطوة انك تبتدي من الصفر ، ابتدي بقى اقرا عن مجالك أكتر و اعمل أبحاث عنه ، احضر sessions كتير لناس متميزة في المجال ، و دوّر على ناس سبقتك في مجالك و أتكلم معاهم شوفهم بدأوا ازاي، أهم حاجة في الفري لانس هي شبكة العلاقات … علاقاتك قوية هتوصل بسرعة …

بعد كدة ابني لنفسك اسم ؛ علامة تميزك … اعمل شغل وهمي لشركات من خيالك عشان تتعلم sequence الشغل ماشي ازاي ، و ابتدي مارس اللي اتعلمته في النشاط التطوعي اللي انت فيه بطريقة بروفيشنال أكتر .. حتى لو هتعمل شغل مجاني في الأول المهم انك تبدأ.

كدة انت بتبني لنفسك portfolio .. كل ما كان قوي كل ما فرصتك بتزيد في السوق ، بعد كدة تعرضه على الناس و من هنا هتلاقي الناس بدأت تكلمك عشان تشتغل …

بس خد بالك من نقطة ، الحياة من بمبي يعني هتغلط في الأول و هتتعلم من غلطك ، هتتعرض لناس ممكن ينصبوا عليك بس هتعرف تحرّص منهم لو حصلت معاك بعد كدة أو من قبلها أصلا من كلامك مع الناس الخبرة في المجال .. و طول ما انت بتتعلّم انت بتكتشف حاجات جديدة في السوق ناقصاك بتشتغل على نفسك فيها و بالتالي بتتقل في السوق .. بس كدة

– كلامك حكم يا باشا فهمتك ، ألف شكر انت كدة حطيتني على أول الطريق فعلا.

= على إيه يا كبير .. ربنا يوفقك.

* يللا الأخر يا حضرات* قالها سواق الميكروباص و نزل عبد الفتاح و عينه فيها بريق أمل جديد ، وبكدة يكون لقى طرف الخيط اللي كان بيدوّر عليه و عاد ترتيب أفكاره عشان يعرف هيبتدي ازاي

و نزل وراه الراجل العجوز أبو جورنال و نسي ياخد باقي العشرين جنيه.